ពងក្រួចប្រហែលមនុស្សជាច្រើនគិតត្រឹមថាជាអាហារធម្មតា តែការពិតទៅ វាអាចផ្តល់ប្រយោជន៍ច្រើនណាស់សម្រាប់សុខភាពមនុស្សទូទៅ មិនថាតែបុរសឬនារី។ ខាងក្រោម Knongsrok ចែករំលែកនូវប្រយោជន៍ធំ ៤ ដែលអ្នកអាចទទួលបានពីការទទួលទានពងក្រួច៖
៤) ចិញ្ចឹមឈាម
ស៊ុតក្រួច មានអាស៊ីតអាមីណូគ្រប់ប្រភេទ ផូស្វ័រលីពីតដែលមានគុណភាពខ្ពស់ និងសារធាតុចិញ្ចឹមសំខាន់ៗផ្សេងទៀតដែលរាងកាយត្រូវការ។ វាក៏ជួយចិញ្ចឹមឈាម ល្អសម្រាប់ស្រ្តីដែលមានសភាពស្លេកស្លាំង និងកំពុងពពោះ ហើយវាក៏មានវីតាមីន B2 ច្រើនជាង ២ ដងធៀបនឹងស៊ុតមាន់និងទា ពោលអាចជំរុញការលូតលាស់ដល់កូនក្នុងផ្ទៃបានល្អ។
៣) ជួយចិញ្ចឹមស្បែក
វាក៏មានផ្ទុកនូវប្រូតេអ៊ីន វីតាមីន A, B1, D និងសារធាតុចិញ្ចឹមដ៏មានតម្លៃជាច្រើន ដែលល្អខ្លាំងសម្រាប់រាងកាយស្រ្តី និងជួយបំពេញតម្រូវការអាហារូបត្ថម្ភរបស់រាងកាយ។។ វាក៏គ្រប់គ្រងប្រព័ន្ធ Endocrine ធ្វើឲ្យប្រសើរឡើងនូវភាពស្លេកស្លាំង ការមករដូវមិនទៀងទាត់ ធ្វើឲ្យស្បែកស្រស់ស្អាត មិនយារធ្លាក់ ឬចាស់ជាងវ័យ។
២) បង្កើនសមត្ថភាពខួរក្បាល
វាមានផ្ទុកនូវសារធាតុ Lecithin ដែលខ្ពស់ជាងស៊ុតមាន់ ៣-៤ ដង នេះវាចាត់ទុកថាប៉ូវខួរក្បាលបានយ៉ាងល្អ ដោយចូលរួមក្នុងការអភិវឌ្ឍខួរក្បាល ជាពិសេសសម្រាប់កុមារៗមិនគួរមើលរំលងអាហារនេះឡើយ។ វាក៏មានវីតាមីន D ខ្ពស់ មានប្រយោជន៍សម្រាប់ពង្រឹងដល់ការចងចាំ។
១) ការពារភ្នែក
សារធាតុ Riboflavin នៅក្នុងស៊ុតក្រួច មានឥទ្ធិពលជួយការពារភ្នែក ល្អសម្រាប់អ្នកឧស្សាហ៍ធ្វើការជាមួយកុំព្យូទ័រ និងទូរស័ព្ទ។ អ្នកគួរតែបន្ថែមការទទួលទានពងក្រួច យ៉ាងហោចណាស់ ១ គ្រាប់/ថ្ងៃ ដើម្បីការពារភ្នែក និងធ្វើឲ្យសមត្ថភាពភ្នែកល្អប្រសើរឡើង៕
ប្រភព៖ បរទេស | ប្រែសម្រួល៖ ក្នុងស្រុក