សញ្ញានៃជំងឺថ្លើម ច្រើនតែមិនច្បាស់លាស់។ ប៉ុន្តែប្រសិនបើថ្លើមមានសុខភាពល្អ អ្នកក៏អាចសម្គាល់វាតាមរយៈការផ្លាស់ប្តូរមួយចំនួននៅក្នុងរាងកាយបន្ទាប់ពីភ្ញាក់ពីគេងបានដែរ។ ខាងក្រោមនេះ គឺជាសញ្ញាមួយចំនួន ដែលបង្ហាញឱ្យដឹងថា ថ្លើមរបស់អ្នកស្ថិតក្នុងស្ថានភាពបែបណា ល្អ ឬមួយក៏អត់?
១. សញ្ញា ៣ ដែលបង្ហាញថាថ្លើមមានសុខភាពល្អ
– មិនស្ងួតភ្នែកនៅពេលព្រឹកក្រោកពីគេង
ប្រសិនបើមុខងារថ្លើមមានលក្ខណៈធម្មតា នោះបន្ទាប់ពីភ្ញាក់ពីគេងនៅពេលព្រឹក អ្នកនឹងមិនមានអារម្មណ៏ថាស្ងួតភ្នែក និងមិនមានស្លេសនៅក្នុងភ្នែកឡើយ។
ឱសថបុរាណចិនជឿថា ថ្លើមគឺជាសរីរាង្គដ៏សំខាន់សម្រាប់ភ្នែក។ នេះមានន័យថា មុខងារថ្លើមប៉ះពាល់ដោយផ្ទាល់ដល់ស្ថានភាពភ្នែក។ ប្រសិនបើអ្នកភ្ញាក់ឡើងដោយមានច្រែះច្រើននៅជ្រុងភ្នែក ស្ងួត ឬមិនស្រួល ចូរប្រយ័ត្ន នេះជាសញ្ញានៃបញ្ហាថ្លើម។ ហើយបើអ្នកភ្ញាក់ពីគេងតែភ្នែកមិនស្ងួត គ្មានច្រែះខ្លាំង អ្នកអាចធានាបាននូវសុខភាពថ្លើមរបស់អ្នក។
– អារម្មណ៍ស្រស់ថ្លា មានស្មារតីល្អនៅពេលព្រឹកក្រោកពីគេង
ជាធម្មតានៅពេលយើងសម្រាក ថ្លើមនឹងបំបែកជាតិពុលក្នុងខ្លួន ហើយបណ្តេញវាចេញ។ ដូច្នេះហើយ នៅពេលដែលអ្នកក្រោកពីដំណេក រាងកាយនឹងបានធូរស្រាល ស្រួលខ្លួន ស្មារតីក៏ស្រឡះល្អ និងងាយស្រួលក្នុងការផ្តោតអារម្មណ៍លើការងារ។
ប្រសិនបើអ្នកក្រោកពីដំណេកនៅពេលព្រឹក ជាមួយនឹងរាងកាយដែលមានសុខភាពល្អ ពោរពេញដោយថាមពល នោះមានន័យថា មុខងាររបស់ថ្លើមនៅតែធម្មតា ថ្លើមមិនមានគ្រោះថ្នាក់នោះទេ។
– គេងលក់ស្រួល
មនុស្សដែលមានមុខងារថ្លើមមានស្ថិរភាព ច្រើនតែមានគុណភាពដំណេកប្រសើរជាងមុន។ ជាពិសេសអ្នកដែលមានថ្លើមមានសុខភាពល្អ ទំនងជាមិនសូវមានការគេងមិនលក់ ហើយអាចគេងរហូតដល់ពួកគេភ្ញាក់ពីគេងតាមធម្មជាតិ។
ប៉ុន្តែប្រសិនបើអ្នកឧស្សាហ៍ភ្ញាក់ពីគេងនៅម៉ោងមួយ ឬពីរព្រឹក ហើយមានបញ្ហាក្នុងការចូលគេងវិញបន្ទាប់ពីដឹងខ្លួន វាអាចមានបញ្ហាជាមួយនឹងមុខងារថ្លើមរបស់អ្នក។ ការគេងមិនលក់ក៏កាន់តែអាក្រក់ទៅៗ។
២. សញ្ញា ២ ព្រមានការខូចខាតថ្លើម
– ដង្ហើមមិនល្អ
មនុស្សភាគច្រើនសន្មតថា ក្លិនមាត់មិនល្អ គឺបណ្តាលមកពីអនាម័យមាត់មិនត្រឹមត្រូវ។ ទោះជាយ៉ាងណាក៏ដោយ នេះក៏ជាសញ្ញានៃមុខងារថ្លើមខ្សោយផងដែរ។ ដោយសារតែការថយចុះសមត្ថភាពរបស់ថ្លើមក្នុងការបន្សាបជាតិពុល រាងកាយរបស់យើងប្រមូលផ្តុំជាតិពុលជាច្រើន។ នេះជាមូលហេតុនៃក្លិនមាត់មិនល្អ។
ជាពិសេស ចំពោះអ្នកដែលមានជំងឺថ្លើម ទឹកប្រមាត់ត្រូវបានកាត់បន្ថយជាញឹកញាប់ រារាំងដល់ដំណើរការបញ្ចេញចោល នាំឱ្យនៅទ្រឹង ហើយជាតិពុលក្នុងរាងកាយមិនអាចកម្ចាត់ចោលបានឡើយ។ ជាលទ្ធផល ក្លិនមាត់អាក្រក់កាន់តែធ្ងន់ធ្ងរទៅៗ។
ដូច្នេះ ប្រសិនបើអ្នកសម្គាល់ឃើញថា ដង្ហើមរបស់អ្នកមានក្លិនដូចអាម៉ូញាក់ខ្លាំង ដែលមិនមានភាពប្រសើរឡើង សូម្បីតែបន្ទាប់ពីដុសធ្មេញរបស់អ្នក សូមទៅពិនិត្យថ្លើមរបស់អ្នកភ្លាមៗ។
– ជូរមាត់
រសជាតិជូរចត់នៅក្នុងមាត់របស់អ្នក នៅពេលអ្នកក្រោកពីដំណេកនៅពេលព្រឹក អាចបណ្តាលមកពីកង្វះជាតិទឹកនៅក្នុងខ្លួន។ ប៉ុន្តែប្រសិនបើអ្នកឧស្សាហ៍មានអារម្មណ៍ថាមានរសជាតិល្វីងនៅក្នុងមាត់ វាអាចនឹងមានភាពមិនធម្មតានៅក្នុងថ្លើម ដែលបណ្តាលឱ្យទឹកប្រមាត់ដែលលាក់ដោយថ្លើម ហៀរចូលទៅក្នុងមាត់ នាំឱ្យជូរចត់ក្នុងមាត់។
ក្រៅពីនេះ អ្នកដែលមានជំងឺរលាកថ្លើម ងាយនឹងស្ងួតមាត់ សូម្បីតែភ្ញាក់ពីគេងពាក់កណ្តាលយប់ ដោយសារតែស្រេកទឹកក៏ដោយ។
ប្រសិនបើអ្នកសម្គាល់ឃើញរោគសញ្ញាខាងលើណាមួយ អ្នកគួរតែស្វែងរកការព្យាបាលភ្លាមៗ។ ទោះជាយ៉ាងណាក៏ដោយ អ្នកក៏ត្រូវចាត់វិធានការដើម្បីការពារថ្លើមរបស់អ្នក ដូចជាការមិនពិសាគ្រឿងស្រវឹង របបអាហារដែលមានសុខភាពល្អ និងធ្វើលំហាត់ប្រាណឱ្យបានទៀងទាត់ ការប្រុងប្រយ័ត្នជាមួយនឹងថ្នាំមួយចំនួន និងការការពារជំងឺរលាកថ្លើមដោយមេរោគ។ ពិនិត្យរកមេរោគរលាកថ្លើម មិនត្រូវប៉ះ ឬធុំក្លិនសារធាតុពុល ត្រូវប្រយ័ត្នពេលប្រើឱសថ និងអាហារមុខងារ-ល-៕
ប្រភព ៖ Phunutoday / Knongsrok